Catalogue description MARECHAL DE BIRON to LORD WILLOUGHBY.

--Monsieur, j'attendoy il y a deux moys de vous escrire par [blank], que le Roy debvoit envoyer vers la royne ; cela a passé de jour a aultre, si beaucoup de choses sont advenues par l'arrivée des forces que le duc de Palme a envoyées et puis menées. Et encores qu'il fut grandement fort et plus que le Roy, sa Majesté est allé audevant de luy sept lieues pour luy donner la bataille, mais il s'est fortifié d'un costé de la riviere de Marne, d'autre d'un marez [i.e., marais] et puis par tranchée. Il a peu stanter et patir longuement en cest estat, d'autant que ses gens de guere sont payez, et avoit baille quelque argent aux françois ligueurs. Le Roy enfin s'est retiré, voyant qu'il n'y avoit point moyen de combatre, apres avoir pourvueu aulx villes qui sont audessus et audessoubs de la riviere de Seine, en son hobéissance, qu'est par la qu'il fault que Paris s'avitaille, je ne dy pas en un coup, mais tout du long de l'anneé. Sa Majesté a pourveu aussi a la ville de St. Denys, qui est a la campaigne, comme a celles de Senlis et Beaumont et aulx chateaux de Dammartin et Nantouillet, qui est pour garder toutte la campaigne qui est du coste de la Picardie ; de sorte que tenant ces villes et les rivieres, ceulx de Paris seront aussi mal d'icy a six mois qu'ilz ne sont a cette heure, car ils ne vivent (et bien petitement) qu'au jour a la journée. Si le Roy eust eu les forces que les princes d'Allemagne luy avoient mande tant seulement pour quinze jours ou trois sepmaines, Paris fust esté remis en l'obeissance de sa Majesté. Le Roy s'est retiré sur la riviere d'Oyse, et de la est venu assieger ceste ville de Clermont qu'il a prinse, mais estant allé recognoistre le chateau qui est le plus fort et l'assiette bigearre et marquant la place de la batterie, j'y fus blessé d'une harquebuzade, mais j'espere que je n'en auray que le mal j'en avoy en auparavant fix, et avoy esté en six battailles, et ay eu quarante six charges, j'ay pres de soixante six ans, j'ay vendu pour six vingt mille escuz de bien, et servy six Roys. Il me semble que c'est assez pour me retirer. Je ne scay s'il sera a propos, Monsieur, que je vous dye avoir entendu que l'on a fait un rapport a la Royne que je ne m'accordoy point avecques Messieurs de la Noue, Guitry et de Plessy. Nous sommes fort bien ensemble et communiquent tous les jours, mais je ne m'accorderay point aux ceulx qui ont ruyné le feu Roy, et son estat, (et pour dire la verité) qui sont cause que Paris n'est pas prins. Pour ce que cela me touche, je ne me suis sceu garder de vous en escrire, afin que si vous en oyez parler que veus respondiez pour moy." Signed.

Endorsed :--" Le Mareschall Byron. Rec. at Grimsthorp, 8 Nov."