Catalogue description COUNT MAURICE OF NASSAU to LORD WILLOUGHBY.

--"Ayant veu par voz lettres du 8me jour de ce mois, stilo veteri, que vous avez esté esbahy d'entendre le siege de devant ma ville de Gheertruydenberge, je ne puis delaisser de vous dire que Messieurs les Estats et moy avons eu ung extreme regret de nous veoir reduicts a ce poinct; et vous pouvez assez juger qu'aprez une longue, tedieuse et vaine attente que suyvant vostre promesse vous eussiez remis ladyte ville entre nos mains, et que d'aultrepart, nous ayans tenté tous moyens doulx et convenables pour remectre les gens de guerre estans en ladyte ville au bon chemin, et leur faire recognoistre leurs superieurs legitimes, mais n'y ayans aucunement voulu entendre, nous n'avons pour le lieu que nous tenons peu moins faire que d'avoir recours aux moiens et pouvoir que le Seigneur Dieu nous a mis es mains; d'aultant plus, que les oultrages, insolences et desobeyssance desdits gens de guerre estoient venues a tel et si hault degré que plus n'avoient laissé aulcun lieu a la raison. Car pardessus les pilleries et extorsions desja par eulx commises, et sans avoir aulcun regard a ce que les Estats et moy avons ey devant faict pour eulx au furnissement de si grande et notable somme de deniers, comme il vous est cogneu, ilz n'ont eu honte de menacer le pays de s'attacquer a tous les batteaux passans et repassans ceste riviere. Mesmes qui pis est, ayans depuis aulcuns jours en ça par moy esté requis de se trouver es environs de Bergues sur le Zoom pour assister a l'execution de certain exploict tendant au bien du pays, il m'a esté, par le Sieur Wingfelde, en termes bien expres respondu qu'ilz n'estoient deliberez de le faire, et plustot que de se rendre en l'obeyssance des Estats ilz estoient deliberez de demander secours de l'ennemy. Et vous presentant en cest endroict mes tres affectueuses recommandations . . . je supplieray Dieu vous avoir, monsieur, en sa saincte garde." Signed.